Ad Enotrio

NT'O CORA TI RESTARU...

(ad Enotrio Pugliese)




Io chi restavi cca stancu e malatu

passavi avanti 'a casa a lu paisa

duva criscisti, e duva 'a cotraranza

s'addormentau a nu vancu

cu nu sonu mbrahatu 'e ciarameddha.

Era chiusu 'u portuna e ogni finestra.

C'era l'erva crisciuta a lu scaluna

e nte l'ortu 'a prunara gia' hjuruta.

Nt'a chiazza abbandunata,

quandu la notta affuca vuci e luci,

mo nescianu nt'o scuru de' vineddhi

i genti, ncatturati cu i pinneddhi,

chi ti portasti fora

m'attizzi 'u focu all'anima nchiatrata.

Nt'o cora ti restaru 'e stu paisa

i praji chini 'e sula,

i varchi abbandunati

senza nu marinaru

stendutu all'umbra 'u dorma.

Ti restaru de' casi i ciaramidi

chi fannu de timpagnu a la miseria

e non fannu nescira li suspiri.

Nt'o cerveddhu mpingiuta

na staziona assulata:

l'urtimu trenu, chinu comu n'ovu,

ficia assu cogghia tuttu e poi frischiau.

Ti portasti ogni cosa e dintra l'occhi

ncorniciasti 'u ritrattu de sta terra,

comu nu ricordinu chi si minta

cu na lampa addhumata

supra 'u cumo' mu t'arricorda i morti.

Si arresci 'u pitti ancora

i sonni de sta genta chi suspira,

pitta l'urtimu sonnu 'e nu poeta

e 'u pinneddhu accarizza stu paisa

chi ti restau nte l'anima nchiovata.


- Achille Curcio -